Bellwright

წარმოიდგინეთ შუა საუკუნეების წყვდიადში მოცული სამყარო, სადაც პოლიტიკური ინტრიგები და ძალაუფლებისთვის დაუნდობელი ბრძოლა, როგორც აჩრდილი, ისე დაგყვებათ კვალდაკვალ. უდანაშაულოდ გასამართლებული ხართ პრინცის მკვლელობაში და სასიკვდილო განაჩენს ძლივს გადაურჩით, ახლა კი, მზის სხივებს მოწყვეტილი, ჩრდილში ხართ გახიზნული. მოულოდნელად, ხელში ჩაგივარდებათ თქვენს მოსაკლავად დაქირავებული მკვლელის კონტრაქტი, რაც უამრავ კითხვას ბადებს – იქნებ, ამ ყველაფრის უკან გაცილებით დიდი შეთქმულება იმალება? სიმართლის ძიებაში ბრუნდებით იმ მიწაზე, საიდანაც ოდესღაც გაიქეცით.

Bellwright გთავაზობთ, ჩაეფლოთ აჯანყების მორევში, სადაც თქვენი გადაწყვეტილებები განსაზღვრავს არა მხოლოდ თქვენი არმიის ბედს, არამედ მთელი ქვეყნის მომავალს. გააერთიანეთ მიმოფანტული ძალები, შექმენით ძლიერი დასაყრდენი და აღადგინეთ სამართლიანობა ამ გაწამებულ მხარეში. თქვენს მხრებზე გადაივლის საკუთარი დასახლებების აშენება-გაფართოება, მიწების ჩაგვრისაგან გათავისუფლება, ადგილობრივი მოსახლეობის დახმარება და, რაც მთავარია, თქვენს მხარეს ახალი მოკავშირეების გადმობირება. შეაგროვეთ რესურსები, წვრთნეთ ჯარი და დაიბრუნეთ დაკარგული ნდობა – ეს არის თქვენი უპირველესი ამოცანა.

Bellwright-ში თქვენ შეძლებთ რესურსების მოპოვებას, ნადირობას, მშენებლობასა და უნიკალური ნივთების შექმნას, რაც თამაშს უფრო მრავალფეროვანს ხდის. გამოიკვლიეთ უზარმაზარი სამყარო, საიდუმლოებებითა და თავგადასავლებით სავსე. გახსოვდეთ, მარტო სამეფო არმია როდია თქვენი მტერი! თქვენ პატარა ბანაკიდან დიდ აჯანყებამდე რთული გზის გავლა მოგიწევთ. გააუმჯობესეთ ურთიერთობა სხვა დასახლებებთან, გაზარდეთ ჯარი და გაათავისუფლეთ ტერიტორიები მტრის მარწუხებისგან, რათა თქვენი მიზნები უფრო ახლოს მიიყვანოთ. ყველა ახალი მოკავშირე ფასდაუდებელ ცოდნას მოგიტანთ, რაც თქვენი ქალაქების განვითარებაში დაგეხმარებათ.

ამ თამაშში თქვენ მოგიწევთ არა მხოლოდ ბრძოლა და სტრატეგიული უნარების გამოვლენა, არამედ იმ სიმართლის ამოხსნაც, რომელიც თქვენი ოჯახის წარსულშია ჩამარხული. შეძლებთ კი, ამოხსნათ საიდუმლოებები, სანამ სამეფო მათ სამუდამოდ დამარხავს?